Տեղի է ունեցել ՀՀ պաշտպանության նախարարի պաշտոնակատարի մամուլի ասուլիսը
13 Նոյեմբերի, 2018 11:30Պաշտպանական գերատեսչության ղեկավարը ներկայացրել է ՀՀ զինված ուժերում վերջին շրջանում իրականացվող աշխատանքները, մասնավորապես՝ սպառազինության նոր միջոցների ձեռքբերման և մատակարարման, նյութատեխնիկական ապահովման և զինծառայողների սոցիալական խնդիրների լուծման ուղղությամբ ձեռնարկվող միջոցառումները:
Անդրադառնալով սահմանային իրավիճակին՝ Դավիթ Տոնոյանը նշել է, որ Դուշանբեում Հայաստանի Հանրապետության վարչապետի և Ադրբեջանի նախագահի միջև ձեռքբերված պայմանավորվածության համաձայն երկու երկրների միջև հաստատված օպերատիվ կապը գործում է անխափան: Այդ նպատակով և՛ Հայաստանում, և՛ Ադրբեջանում նշանակված են համապատասխան պաշտոնյաներ, որոնց միջոցով էլ փոխանցվում են անհրաժեշտ տեղեկությունները:
ՀՀ պաշտպանության նախարարի պաշտոնակատարն անդրադարձել է նաև ադրբեջանական լրատվամիջոցների և պետական կառույցների կողմից շրջանառվող կեղծ տեղեկություններին, թե իբր Նախիջևանի ուղղությամբ Ադրբեջանի զինված ուժերը տարածքներ են գրավել: «Հայ-ադրբեջանական պետական սահմանի Նախիջևանի հատվածում Ադրբեջանի զինված ուժերը ոչ մի տարածք չեն գրավել»,- վստահեցրել է Դավիթ Տոնոյանը:
ՀՀ պաշտպանական գերատեսչության ղեկավարը խոսել է նաև հայկական զինանոցը բազմաֆունկցիոնալ կործանիչներով համալրելու հետ կապված տարբեր ընկերություններից ստացվող առաջարկների, բանակում իրականացվող նոր նախաձեռնությունների ընթացքի, զինծառայողների սոցիալական երաշխիքների, մասնավորապես՝ բնակարանային ապահովման ընթացակարգի և սպաների հիփոթեքային վարկավորման նոր ծրագրի, բանակում սննդի կազմակերպման, ինչպես նաև զինվորական հագուստի որակական փոփոխության ուղղությամբ իրականացվող քայլերի մասին: